Алғашқы ғылыми-білім беру зертханасының ашылуы

2013 жылдың 27 мамырында Қ.И.Сәтбаев атындағы Қазақ ұлттық техникалық университетінде Президенттің бастамаларын қолдау және «Қазақстан-2050» Стратегиясын жүзеге асыру аясында Қазақстандағы алғашқы ғылыми-білім беру зертханасы «Newinttech-ҚазҰТУ Академиясы» ашылды. 

Қош келдіңіздер сөзінде ҚазҰТУ ректоры академик Әділов Жексенбек Мәкеұлы ұзақ мерзімді ынтымақтастыққа үміт білдіріп, зертхананы елдің жетекші техникалық жоғары оқу орнында ашқаны үшін Newinttech бас директоры Канафин Байжан Болатбекұлына алғысын білдірді.

Зертхананы құрудың негізгі мақсаты - қазақстандық студенттерді Documentolog заманауи бағдарламалық өнімі негізінде кәсіпорындардың бизнес-процестерін модельдеу әдістеріне практикалық дайындау. Осы зертхана аясында "Бизнес-процестерді талдау және модельдеу" курсы өткізіледі. Оқыту арнайы оқу-әдістемелік және білім беру материалдары бойынша Newinttech сертификатталған тренерлері арқылы жүргізіледі. Курсты аяқтап, емтихан тапсырғаннан кейін тыңдаушылар сертификат алады.

Ашылу салтанатына ҚазҰТУ оқытушылары мен ҚР Көлік және коммуникация министрлігінің өкілдері қатысты.